من سنين، لما حذرت انا شخصياً كتير من الاحزاب والرفاق والافرقاء وبكركي والرهبنة المارونية والفاتيكان، كتابةً او بالاجتماعات المباشرة، من مشاركتي بالمؤسسات التابعه للبطريركيه المارونيه او باجتماعات التي نظمتها مؤسسة لابورا او الاجتماعات مع الاحزاب والشخصيات السياسيه مع رئيس التيار الوطني الوزير جبران باسيل ورئيس القوات اللبنانيه د.سمير جعجع ورئيس حزب الكتائب الشيخ سامي الجميل ورئيس حركة الاستقلال النائب ميشال رينه معوض والرئيس مجلس النواب المحامي نبيه بري وفخامة العماد اميل لحود وفخامة العماد ميشال سليمان وفخامة الشيخ امين الجميل والوزير اكرم شهيب عن الحزب الاشتراكي وفخامة العماد ميشال عون والسفير البابوي والعديد من النواب والشخصيات الدينيه والسياسيه ، ما حدا سمع ولا حدا فهم عمق كلامي او يمكن بالأحرى تجاهلو عن قصد! بعدها، وقعت الثورة ودخلنا بالانهيار وتدمير بيروت. بوقتها كمان، حذرت الثوار من اليسار الغوغائي والشرذمة ونشوة الظهور بالاعلام والتسكع عند جماعة المنظومة والسعي لركوب موجة السلطة المنخورة بالفساد وما حدا كان يسمع، وخونونا وسِكْرو بوجهنا حلم التغيير من جوا، ونسيو آنو اللبناني ما بيعرف الا نغمة "يا ربي نفسي" وصارو بدهم يدخلو البرلمان كتغييريين وهني ما قدرو لسنين يوحدو الثورة ويعملولها كيان بسبب مشاريعهم الخاصة.
مبسوطين يا جماعة السلطة المدنية والدينية ويا جماعة ثورة ال ٦٥٠ مرشح؟ قرب الوقت وبلشت الناس تموت ببيوتها
هلق أخر مشاريع المنظومة، إنو يبيعو الذهب ويطبعو عملة ويغلو كل شي ويدفعو معاشات القطاع العام والعسكر ع سعر منصة ٨٠٠٠ ليرة للدولار، ونحن بعد ما نسينا مفاعيل سلسلة الرتب والرواتب بال ٢٠١٧. قال هيك بيزيط كل شي، بدل ما يكون الحل بوقف السرقة وتقوية وضع العملة واسترداد الاموال المنهوبة وتفعيل الجباية والشفافية وتشجيع الاستثمارات والإستعانة بالمختصين المستقلين والتسريع بعمل القضاء المستقل. قولكم طرحهم بريء او مطلوب منهم افلاس البلد وحرق كيانو وتهجير شعبو، وساعتها قديه رح يوصل سعر الدولار؟
نحن بوطنا ما منعرف قيمة المفكر والمبدع والفنان الا ما ينجح ويتكرم بالخارج او يموت!
نحن ما منعرف نبني وطن إنما اوهام وعصابات ودكاكين ومزارع!
نحن عم نتعرض لأذكى إبادة جماعية مبطنة حصلت بالتاريخ!
نحن لما منبكيك يا وطني منكون عم نبكي ع حالنا لأنو أكيد الدور جايي علينا!
نحن عم منموت وعم نتعرض لأقسى ما ممكن يتعرضلو إنسان وفيه قسم من شعبنا عم يرقص ع وجعنا وكأنو مش عايش معنا!
نحن المصارف عنا طلعت كلها دكاكين شغلتها التنصيب عَ كل مين آمن بوطننا وبالنظام المصرفي عنا!
نحن منهجر شبابنا ومنرجع مِنْسَوِقْ أننا عم نستقبلهم سواح لما بيجو تيوقفو مع اهلهم بهالظروف الصعبة!
نحن صرنا مدرسة إختصاصها النهب وإنتقامو من الناس المؤمنة والأوادم اللي ما عنهم ضهر بهالبلد!
نحن ما منستاهل كل هالقهر والزعل اللي زرعو بقلوبنا تلاميذ يهوذا والشيطان عالأرض!
يا وطني نْطُرنا قريباً كتار منا لاحقينك، او بسبب القهر او بسبب المرض او بسبب الجوع او بالانتحار... الناس تعبت واستسلمت قدام ازدياد الغلا والنكبات، واللي باقي ما بقى كتير، وحتى لو متنا كلنا بهالوطن ما حدا رح يسإل فينا وضحايا انفجار بيروت صارو حدك فيك تسألهم!
يا حرام يا وطني يا لبنان
رئيس حركة الارض اللبنانيه
